ΤΑ ΔΥΟ ΠΑ Κ' ΕΛΕΠ'ΝΕ ΚΑΛΑ!!!!!

 ΚΑΙ ΕΝΑ "ΑΝΕΚΔΟΤΟ" ΑΠΟ ΤΗΝ ΠΑΤΡΙΔΑ ΟΠΩΣ ΜΑΣ ΤΑ ΠΑΡΕΔΩΣΑΝ ΟΙ ΠΑΠΠΟΥΔΕΣ ΜΑΣ....

Ο Σίσκον ο Γιωρίκας ετοιμάεν να πάει ψαλαφά κορίτσ' για τον γιον ατ ' τον Γιαγκούλην. Επέρεν μετ' εκείνον και τον γείτονάν ατ' τον Αρίστην, τον Γιανουτήν κ' εδαρμένεψεν ατον ντο να λέει.
- Όντες θα έρται η σειρά μ' να καλατσεύω, είπεν ατον, ήνταν λέγω εγώ, εσύ θα διπλάεις ατο, τεμάκ έναν λέγω εγώ, δύο θα λες εσύ.
- Καλά, είπεν ο Αρίστης, θα ευτάγω άπως λες.
Αρ' όντες έρθεν η σειρά τη Γιωρίκα, είπεν τοι συμπεθέρτς.
- Ακούστεν ντο προίκαν θα δίγω σον γιο μ' τον Γιαγκούλην.
Θα δίγ' ατον πέντε στρέμματα χωράφα αφκά σην βάλταν και πέντε στρέμματα σα καψούρας.
-Ψέματα λέει, είπεν ο Αρίστης, δέκα στρέμματα θα δί' ατον σην βάλταν και δέκα σα καψούρας.
- Θα διγ' ατον κ' έναν χτήνον.
- Ψέματα λέει, δύο χτήνα θα δι' ατον.
- Ατώρα ας λέγω σας και το κουσούρ' τη παιδά. Τ' έναν τ' ομμάτ'ν ατ' 'κ' ελέπ' καλά.
- Ψέματα λέει, τα δύο πα 'κ' ελέπ'νε καλά.

Ξηραντέρ

ΛΕΞΙΛΟΓΙΟ

σίσκος = χοντρός
να ψαλαφά = να ζητήσει (ρ. ψαλαφώ)
Γιαχουτής = Εβραίος
εδαρμένεψεν ατον = τον δασκάλεψε (ρ. δαρμενεύω)
να καλατσεύω = να μιλήσω
ήνταν = ό,τι
θα διπλάεις ατα = θα τα διπλασιάσεις (ρ. διπλάζω)
τ ε μ ά κ = δηλαδή
ευτάγω = κάνω
αρ ' όντες = λοιπόν όταν
καψούρα = άγονο
χτήνον = αγελάδα