Ποντιακά δίστιχα της αγάπης

Δευτέρα, 19 Μαρτίου 2018

1. Κορτσόπον κα θα λέγω σε κα θα παρακαλώ σε
τ' ημψόν τη ψη 'μ ας δίγω σε και μία ας φιλώ σε.

2. Κορτσόπον τα μαλλόπα σου σην κάρδια 'μ απέσ' κείνταν,
στερέα 'μ καταρούμ' άτα ζευγάρια φίδια 'ίνταν.

3. Κορώνα σείτ' επέτανεν ερούξεν το φτερό άτς,
κόρη, τη μάνα 'σ πέ άτεν ας κρατεί το ξερόν ατς.

4. Κρύον νερόν, κρύον νερόν κρύον 'κι ποτισκάται,
κι άμμον εσέν, τρυγόνα μου σον κόσμον 'κ' ευρισκάται.

5. Λέγνε με κατί τραγωδείς κι ογώ λαλόπον 'κ' έχω,
λέγνε με κατί χαίρεσαι το τρυγονόπο 'μ 'κ' έχω.

6. Λελεύω σε, λελεύω σε κόκκινον πιπερόπον,
για έλα έμπα σο χορόν σο δεξέν το χερόπο 'μ.

7.'λοί εμέν, μάνα, λοί εμέν 'πόνεσεν η κοιλία 'μ
τα χρόνια 'μ δεκατέσσερα κ' έσπρυναν τα μαλλία 'μ.

8. 'λοί εμέν μάνα, ΄λοί εμέν πονεί το ποδαρόπο 'μ.
και 'κ επορώ να πορπατώ και πάγω με τ' αρνόπο 'μ

9. Μάνα, αν είσ'  η μάνα μου κι άν είμαι το παιδόπο 'σ,
εδέβαν τα νεότητα 'μ  υπάντρεψο  'μ οφέτος.

10. Μα τον Θεόν, μα τον Χριστόν, μα τ' είναν άεν κι άλλο
το δαχτυλίδ ντ' εδέκες με ας, σο χέρι 'μ κ' εβγάλλω.

11. Μάνα πολλά χαΐναινα, μάνα πολλά κακέσα 
η μαναχί ' αν έν καλόν  πέσκα ΄σύ  μαναχέσα,

12. Μάνα πολλά χαΐναινα μάνα γιατί 'κι τσιούεις με,
κι ας σην μικρέσσαν τη νύφε 'σ γιατί ν' αποχωρίεις με;

13. Μικρίκον τσιαβαΐρτασσιν έλα κάθκα σο γιάν -ι 'μ
ας λέγω σε τα τιαρτόπα ντ' εδέβαν σο κιφάλ -ι μ.

14. Μικρίκον τσιαβαΐρτασσιν ντ' εχάλανες την ύα 'σ,
ποίος θα σύρ την καμονή 'σκαι την αρωθία σ;

15. Μικρός έμνε κ' ετράνυνα κι ακόμα μεγαλύνω,
σην Παναΐα όμνυσα, το σπαλέρι 'σ να λύνω.


Share
 
Copyright © 2015 Santeos
| Design By Herdiansyah Hamzah