ΚΑΙ ΘΑ ΙΝΕΤΑΙ ΑΣ ΕΜΟΝ ΤΗΝ ΚΑΜΠΟΥΡΑΝ

Ο Τράντον τη Γούρουνος πάντα, όσα επέραζεν εμπροστά ας έναν γυρευόν εδίνεν ατον δύο δραχμάς.
Κάποτε τα πράγματα άλλαξαν. Επέρασαν δύο χρόνια κι ο τράντον άλλο 'κ' εφ'ανθεν.
 Ο γυρευόν πολλά εστεναχορεύτεν. Ας σα δύο χρόνια κ' ύστερα είδεν ατον να έρται και τα κατσία τ' εγέλασαν.
Όντες έρθεν σουμά τ' κ' εδέκεν ατον έναν πενηντάλεπτον, ο γυρευόν εγρίεψεν και είπεν ατον:
-Ντο ευτάς ;; Κι κανείται ντο δύο χρόνια 'κ' εφάνθες αδακέσ' έναν πενηντάλεπτον μαναχά δις με;;
- Ντο να ευτάμε, τα έξοδα επερίσσεψαν. Ο γιο μ' εσέβεν σο Πανεπιστήμιο να ίνεται διατρός και δύσκολα εβγάλ' ατα πέρα.
-Και καλά ο γιος σ' θα ίνεται διατρός και θα ίνεται ας εμόν την καμπούρα;;;

ΛΕΞΙΛΟΓΙΟ

όσα επέραζεν = όσες φορές περνούσε
γυρευός = ζητιάνος
τα κατσία τ' = τα μούτρα του
σουμά = σιμά, κοντά
ντο ευτάς = τι κάνεις
'κι κανείται= δε φτάνει
αδακέσ' = προς τα εδώ
εσέβεν = μπήκε

Δημήτριος Νικοπολιτίδης

Φιλόλογος-Συγγραφέας