ΕΜΕΙΣ ΑΛΛΟ ΤΟΥΖΑΧ' 'ΚΙ ΘΕΛΟΥΜΕ

 Το 1922 τη χρονίας ο Κοπάλ'  Νικόλας, ας σον Άγιον Χαράλαμπον, επήεν σο Κιλκίς να ελέπ’ τον θείον ατ' τον Πάντζον τον ζώγραφον.

Το βράδον, ασσό  έφαγαν κ' ύστερα, ερχίνεσαν να λέγ'νε παλαιά ιστο­ρίας τη πατρίδας. Πολλά 'κ' επήεν και είνας πεντικός εξέβεν σο μεϊτάν κ' ερχίνεσεν να γυροκλώσκεται σην οτάν.

  Επεκεί επήεν εμπροστά σον Κοπάλ ' Νικόλαν, εστάθεν σα δύο ποδάρα  κ' ετέρεσεν ατον απέσ’ σ' ομμάτα. Φαίνεται εγροίκ'σεν ντο έν’ ξένος και έρθεν σο καλωσόρισμαν.

 Που να έξερεν ο καημένον ο πεντικόν πως θα έτρωεν το κιφάλ'ν ατ’.

0 Κοπάλ' Νικόλας, καιρόν 'κ' εχάσεν, έπλωσεν το χέρ’ν   ατ' να πϊάν' ατον, άμα εκείνος επρόφτασεν κ' εσέβεν σο πατσάχ'ν ατ' και πολεμά να εβγαίν’ κι άλλο απάν' να κρύφκεται.

0 Νικόλας έσπιξεν κ’ εφούρξεν ατον κ’ επεκεί έσυρεν ατον εμπροστά σον Πάντζον.

0 Πάντζον εξεραχώθεν ας σα γέλ'τα, και  λογοθέτης όπως έτον, εκλώστεν ετέρεσεν την γαρήν ατ ' την θυμίαν και είπεν:

 - Θύμια, εμείς άλλο τουζάχ’ 'κι θέλουμε.

ΚΙΛΚΙΣ

ΛΕΞΙΛΟΓΙΟ

 ασσό = αφού

εξέβεν σο μεΐτάν = βγήκε στην πιάτσα

οτά = οντάς, δωμάτιο

ετέρνεν ατον = τον κοίταζε

απέσ'= μέσα

εγροίκ'σεν = κατάλαβε

ντο έν' = που είναι

σο πατσάχ'ν ατ’ = στο πατζάκι του

να εβγαίν' = να βγεί

έσπιξεν κ’ εφούρξεν ατον = έσφιξε και τον έπνιξε

 επεκεί = μετά

εξεραχώθεν ας σα γέλ'τα = ξεκαρδίστηκε από τα γέλια

λογοθέτης = ετοιμόλογος

 γαρή= γυναίκα, σύζυγος

τουζάχ' = παγίδα

ΔΗΜΗΤΡΙΟΣ Σ. ΝΙΚΟΠΟΛΙΤΙΔΗΣ
Φιλόλογος- Συγγραφέας