ΦΤΥΣΟΝ ' ΜΕ AΠ’ ΑΤΩΡΑ

Ο Κωστής τη Τσερέπ' είχεν τρανόν ζορ' κ' επήεν να ψαλαφά δανεικά ας σον Νικόλαν τη Κουκάβας.

-Νικόλα , έχω τρανόν ανάγκην, θέλω να δις' με δανεικά 10 χιλιάδες.

 -Ντο δανεικά λες' με εσύ, είπεν ο Νικόλας , τ' άλλα ντ' επέρες ακόμαν 'κ' έγκες και έρθες ψαλαφάς κι άλλα.

-Χάσον τ' άλλα , μη στεναχωρεύ'ς  με ατώρα.

-Είπα σε έχω τρανόν ανάγκην. Σα 10 ημέρας θα φέρω σ' ατα οπίσ'. Αν  κι φέρω σ' ατα φτύσον με.

Ο Νικόλας πονόψυχος όπως έτονε , εξέγκεν κ' εδώκεν ατον τα 10 χιλιάδες.

 Ο Κώστης όντες επέρεν ατα σο χερ’, έσπιξεν ατα δυνατά κ' εκλώστεν είπεν σον Νικόλαν:

-Νικόλα , φτύσον 'με απ' ατώρα κ' εφέκεν κ' έφυεν.

ΛΕΞΙΛΟΓΙΟ

Τσερέπς' = κοκαλιάρης (παρατσούκλι)

Να ψαλαφά = να ζητήσει

Κουκάβας = παρατσούκλι

'Κ' έγκες = δεν έφερες

Εξέγκεν= έβγαλε

Έσπιξεν ατα = τα έσφιξε

Εκλώστεν είπεν = γύρισε και του είπε.

ΔΗΜΗΤΡΙΟΣ Σ. ΝΙΚΟΠΟΛΙΤΙΔΗΣ
Φιλόλογος- Συγγραφέας