ΕΣΥ ΝΤΟ ΘΑ ΕΠΟΙΝΕΣ Σ' ΕΜΟΝ ΤΗΝ ΟΔΗΝ

Ο Χάμπον τη Ταλατέλαλα ας σο Αλεποχώρ', εψαλάφεσεν κ' επέρεν ας σον γειτονάν ατ', τον Κάκον τη Τρόμψονος έναν χιλιάρικον δανεικά. Είπεν ατον έχω τρανόν ανάγκην.
Ο αφορισμένος ο Χάμπον ασσό επέρεν το χιλιάρικον κ' ύστερα, έκλεψεν και την κεσέν τη Κάκονος.
Ο Κάκον εγκάλεσεν ατον και η υπόθεση επήεν σο δικαστήριον.
ΔΙΑΣΤΗΣ: Για πεέι με, κύριε Ταλατέλαλα.
ΧΑΜΠΟΣ: (στον εαυτόν του) Έκλεψα και  εγένουμ'νε και κύριος. Αποτενύ ατό την δουλείαν θα ευτά(γ)ω.
ΔΙΚΑΣΤΗΣ: Γιατί έκλεψες την κεσέν τη Κάκονος;
ΧΑΜΠΟΣ: Κύριε Δικαστή, εσύ ντο θα εποίνες αν έσ'νε σ' εμόν την οδήν; Που θα εβάλ'νες το χιλιάρικον;

Τραπεζούντα

ΛΕΞΙΛΟΓΙΟ

Χάμπος= Χαράλαμπος
Εψαλάφεσεν= ζήτησε (ρ. ψαλαφώ)
Κάκος= Κυριάκος
Ασσό= Αφού
Κεσέ=Πορτοφόλι
Εγκάλεσεν ατον= Τον έκανε μήνυση (ρ. εγκαλώ και αγκαλώ)
Εγένουμ'νε= Έγινα (παρατ. του ρ. γίνο(υ)μαι, ίνο(υ)μαι
Αποτενύ= Στο εξής, από τώρα και ύστερα
Ατόν τη δουλείαν θα ευτάγω=Αυτή την δουλειά θα κάνω
Ντο θα εποίνες= Τι θα έκανες (ρ. ποίω, ποίκω, ποίγω)
Αν έσ'νε σ'εμόν την οδήν=Αν ήσουνα στη θέση μου (ρ. είμαι)

Δημήτριος Σ. Νικοπολιτίδης
Φιλόλογος-Συγγραφέας