ΛΑΜΠΡΗΣ ΧΑΡΑ

Ζούμε με την υπομονήν και με τ' έναν ελπίδαν

 κι αναμένομε την Λαμπρήν, τα καλά τα ημέρας.

Χριστού χαρά θα έρται μας με το «Χριστός Ανέστη».

Σά τρία Λαμπροήμερα  τα τέρτια όλια ανασπάλκουν

 κι αποθαμέν' και ζωντανοί όλια τουν γίνταν έναν. 

Αποθαμέν' πά χαίρουνταν, θ' άφτ'ν άτ'ς πολλά κερία

 κι οι κολασμέν' πά χαίρουνταν, θ' έλέπ'νε φως κι ημέραν.

Οι άκλαυτοι θα χαίρουνταν, γιατί πολλοί θα κλαίγν' άτς 

κι άδέβαστοι κι οι άταφοι, γιατί πολλοί θ' άγγεύν' άτ'ς.

 Οι ζωντανοί πά χαίρουνταν, ντό θα καλοπερνούνε,

αμαρτωλοί πά χαίρουνταν, θα πάνε εσχωρίουν. 

Χαίρουνταν οι παντέρημοι, θ' εύρίκ'νε παργορίαν, 

χαίρουνταν και οι λογιασμέν', γιατί θα σουμαδεύ' κουν,

χαίρουνταν κι οι σουμαδεμέν', τα στέφανα θα βάλ'νε.

Οι γεροντάδες χαίρουνταν, θα πάνε κοινωνίζνε,

οι γραιάδες πά χαίρουνταν, θα πάνε προσκυνούνε,

οι νεοντάδες χαίρουνταν, θα πάν' λουτρουγισκούνταν 

και τα κορίτσια χαίρουνταν, θα φορούν κι αναλλάζνε

 καί τά παιδόπα τά μικρά κόκκινα ώβά θα κρούγνε.

                                                      ★      

ΛΕΞΙΛΟΓΙΟ                                 

άνασπάλκουν = ξεχνιούνται, λησμονιούνται.

άφν' = ανάψουν.

άδέβαστοι = αδιάβαστοι.

άγγεύν' = μνημονεύουν, αναφέρουν.

έσχωρίουν = συγχωριοϋνται, συχωρεθούν.

λογιασμέν' = λογοδοσμένοι.

σουμαδεύκουν = αρραβωνιάζονται, αρραβωνιαστούν.

σουμαδεμέν' = αρραβωνιασμένοι.

νεοντάδες = νέοι, παλληκάρια, 

λουτρουγισκούνταν = λειτουργηθούνε.

άναλλάζνε = βάζουν τά γιορτερά τους.

κρούγνε = τσουγγρίζουν.

ΣΥΝΤΟΜΕΣ ΠΑΡΑΤΗΡΗΣΕΙΣ

H χαρά της Λαμπρής έχει ιδιαίτερο νόημα. Δέν είναι μόνο οι διασκεδάσεις και τα φαγοπότια, οι χοροί και τα τραγούδια. Χαίρονται οί άνθρωποι, γιατί εκπληρώνουν ιερά καθήκοντα την ημέρα της Λαμπρής.

Οι πόντιοι θυμούνται το Πάσχα τούς νεκρούς. Πηγαίνουν στα μνήματα και τους ανάβουν κεριά. Τσουγγρίζουν κοντά στο μνήμα κόκκινα αυγά. Έχουν την ψευδαίσθηση, ότι συντρώγουν με τα προσφιλή τους πρόσωπα.

Το Πάσχα οι θυμωμένοι μονοιάζουν. Οι πονεμένοι και παντέρημοι βρίσκουν παρηγοριά. Έχουν την συμπαράσταση του γείτονα.

Το Πάσχα εξαγνίζονται οι καρδιές. Οι αμαρτωλοί παίρνουν συχώρεση.

Τη Λαμπρή χαίρονται όλοι. Εκπληρώνονται οι πόθοι τους και δικαιώνεται κάθε ευγενικό αίσθημα.

Στάθη Ευσταθιάδη

"Τα Τραγούδια του Ποντιακού Λαού"

Εκδόσεις Αδελφών Κυριακίδη