ΚΛΩΣΟΝ ΑΔΑΚΕΣ ΤΟ ΚΕΡΙΝ

 

Ο ποπά Γιωρτς εποίνεν ποπαδικήν ση Μάλαχαν τη Κιμισχανάς , άμα τα γράμματα ντο έξερεν ολίγα έσαν.

'Οντες εδέβαζεν, εθαρείς αλφάβιζεν.

Αρ ' έναν Κερεκήν ημέραν, σίτα ο γιος ατ' ο Στυλίκον εκράτ'νεν το κερίν κ' εκείνος εδέβαζεν το ευαγγέλιον, Αβραάμ εγέννησεν Ισαάκ, Iσαάκ εγέννησεν Ιακώβ.....το κερίν εγιάντσεν σ' αλλ' το μέρος κι ο ποπά Γιωρτς άλλο 'κ' έλεπεν να δεβάζ.

Ετέρεσεν αλλέως 'κι θα ίνεται, κ' εκλώστεν σον Στυλίκον μερέαν και είπεν:.

Νέπαι, για κλώσον αδακέσ' το κερίν, ας τερούμ' κι αβούτος τη σκύλ' ο γιον τίναν εγέννεσεν.

Δημητριος Σ. Νικοπολιτιδης

Φιλόλογος-Συγγραφέας 

ΛΕΞΙΛΟΓΙΟ

εποίνεν = έκαμνε

Μάλαχα = χωριό του Πόντου

Κιμισχανά = Αργυρούπολη

άμα = αλλά

εθαρείς = νόμιζες

αλφάβιζεν = συλλάβιζε

Αρ ' = λοιπόν

σίτα = καθώς, ενώ

εγιάντσεν = έγειρε

'κ' έλεπεν = δεν έβλεπε

Ετέρεσεν = κοίταξε

εκλώστεν = γύρισε (κοίταξε)

μερέαν = προς τη μεριά

κλώσον αδακέσ' = γύρνα προς τα εδώ

ας τερούμε = να δούμε

τίναν = ποιον