1.
Σα ψηλασέας λάσκουμαι, σα χαμελά γυρίζω,
κ' εκεί σον τόπον ντο πατείς, την πόδα 'σ εγνωρίζω
2. Χαίρουμαι πως 'κι χαίρουμαι, χαίρουμαι νασάν
εμέναν,
άντρα 'σ θα πάει σην ξενιτίαν κ'εσέν θ' αφήν
εμέναν.
3. Σα Πλάτανα ελείβωσεν σην Τραπεζούντα βρέχει,
φοούμαι κατ' παθάν τ' αρνί 'μ κ' η μάνα 'θ άλλο
'κ έχει
4. Σεβτάν έχω, σεβτάν πουλώ και σεβταλής γυρίζω,
σεβτάν έχω σο καρδόπο 'μ και πως να ταγιανίζω.
5. Ση θάλασσας τον πέλαον θα χτίζω το ταφόπο 'μ
θα ρούζω και φουρκίουμαι κ' εσύ ν' άεις το κριμόπο
'μ.
6. Ση Παναΐας το ποτάμ εκρέμψα την κλειδίτσα 'μ
μάνα ρούξον κι αράεψον σ' εμέν κιοριά νυφίτζαν.
7. Ση Κωφού τον ανέφορον χαρτώματα τσιρίζνε,
κι ακεί σ' εμορφον το χορόν κορτσόπα κοκκινίζνε.
8. Σην ζουπούνα 'σ να γίνομαι κουμπίν μαλαματένεν,
να κείμαι σ' αγκαλόπο σου το μαργαριταρένεν.
9. Σείτ' στέκω κάπως γίνομαι, σείτ' στέκω κατ'
παθάνω,
σείτ' στέκω κρούει τ' αρνί 'μ σον νου 'μ και πάω
ν' αποθάνω.
10. Σκυλόπιστος να γίνεται ατέ τ' εμόν η κάλη,
λέει με δέβα σην ξενιτίαν με τ' αβούτο το χάλι.
11.Σον ΑΗλίαν αφκακιάν θερίζ' τ' εμόν τ' αρνόπον
και ντ' έμορφα και νόστιμα κρατεί το καγανόπον.
12. Χιονίγα, μάνα 'μ χιονίγα, χιονίγα 'πατουλίγα,
και σον Αέρ αφκά καικά, την κάλη 'μ ετυλίγα.
13.Σον ουρανόν πετά πουλίν σην γήν ευτάει εβόρραν
εμέν κατηγορούνε με πολλ' αγαπάς την χώραν.
14. Συλλογισμένα πορπατώ τα χέρια 'μ
σταυρωμένα,
κανείς κακόν να μη παθάν αρνί 'μ άμον εμένα.
15. Τ' αρνί 'μ ελιγοθύμεσεν σην αγκάλια 'μ ερούξεν
ξάϊ μη κατηγοράτε το τσεχέλκον έν κ'
εγροίξεν.
16. Τ' αρνί 'μ επαρακάλν' άτο κι ατό εποίνεν νάζια
τα δάκρια 'μ εκατήβαιναν Καλομηνά χαλάζια.
17. Τ' αρνόπον 'μ κείται άρρωστον κι ογώ σύρω τα
πόνια
Θεέ 'μ να κοφτς και δις ατο τ' εμά τ' ημψά
τα χρόνια.
18. Τ' αρνόπο 'μ κείται άρρωστον και ση
θανάτ τα χάλια,
αρρωστικά θα φέρ' άτο τη Γιάφας πορτακάλια.
19. Τ' άστρια με τ' άστρια πολεμούν κι ο ήλεν με
το φέγγον,
ο κόσμος με τον κόσμον ατ' κι ογώ με την Ελέγκων.
20. Τα τραβωδίας τα καλά τ' έναν πέ τ' άλλον άξον,
τα έμορφα τα κορτσόπα τ' έναν φίλ' τ' άλλο δάξον.
Δεν υπάρχουν σχόλια:
Δημοσίευση σχολίου