Αν ’κι θέλτς να πίνω, δέβα ποίσον άτς εσύ ποπαδικήν

Ο πόπαΚωνσταντίνον ο Κογκοσιάς σα Φτελένια εποίνεν ποπαδικήν.

Εσχωρεμένον πολλά εγάπανεν το ρακίν  και έπινεν, επαραμεθύνεν και άλλο

ντ’ εποίνεν 'κ έξερεν μίαν ’κ έτον δεύτερον ’κ  έτον, επουγαλεύταν και εγκάλεσαν  άτον σον δεσπότ.

Ο δεσπότς έστειλεν κ’ εκούξεν άτον και είπεν άτον: Πάτερ παπαΚωνσταντίνε, ακούω πολλά πίντζ, και ευτάς ανησυχίας· αυτά σο σχήμα μας ’κι ταιριάζνε.

Ο ποπαΚωνσταντίνον νιά εδέκεν, νιά επαίρεν και είπεν τον δεσπότ: Δεσπότη μου, εκειαπάν-καικά τα χωρία μακρά είν τ’ έναν ας άλλο, αναμεσά ’τουν  υλέητα είναι και oι λύκ και άρκ το τιβόλ παίζνε. Μεσανυχτί έρχουντατ κούζνε με να πάω δίγω κάτηναν μετάδοσην ογώ αν ’κι σύρω κάμποσα ας σ’ οσπίτ ’κ εβγαίνω και αν ’κί θέλτς να πίνω, δέβα ποίσον άτς εσύ ποπαδικήν και πριν να τελέν το λόγον άτ, εχπάστεν να  εβγαίν.

-Κάθκα τσιάνουμ, είπεν άτον ο δεσπότς, ’κι λέω σε μη πίντζ... πία άμα μη παραδεβάεις άτο.

Νικόλαος  Τοπαλίδης

ΛΕΞΙΛΟΓΙΟ

εποίνεν= έκανε

επουγαλεύταν(τουρκική λέξη)= κουράστηκαν

εγκάλεσαν= κατήγγειλαν

εκούξεν=φώναξε

ευτάς= κάνεις

νιά (τούρκικη λέξη)=ούτε

εκειαπάν-καικά= εκεί κάτω

υλέητα=δάσος, δάση

τιβόλ= κρυφτούλι

κάτηναν=κάποιον

εχπάστεν= ξεκίνησε

παραδεβάεις άτο= περνάς το μέτρο