Κοσμοφωτοδότες (Θαυμασμός προς τον Ακρίτα)

- Ακρίτα μ’ και Τραντέλλενα και χρυσαρματωμένε,

αγέραστε κι ανίκητε, δαφνοστεφανωμένε

και δοξασμένον τ’ όνομα σ’ σα γενεάδες όλια,

για πέ με για τα γονικά σ’ και που κρατεί  η ρίζα σ’;

Ακρίτας
πίνακας Δ. Σκουρτέλη

Τίνος κυρού παιδίν ιγεύ’ς και ποίος εν η μάνα σ’;

Και ποιον μοίρα επρόσταξεν κι εσύ σον κόσμον έρθες;

-Ο κύρη μ’ εν ο Καύκασον, σα κόσμια ξακουσμένος,

μάνα μ’, η Μαύρη Θάλασσα, με τα πολλά φορτούνας.

Ο Καύκασον εφίλεσεν τα κύματα τ’ς τα κρύα

και με τ' εκείν το φίλεμαν, τη θάλασσας τα σπλάχνα

εγένταν αναχάπαρα ζεστόν ζωής φωλέαν.

Αοίκον είχα ριζικόν,αέτ’ς  εμοιροπλάστα.

Κι όντες τη Μαύρη Θάλασσαν εντώκανε τα πόνια

κι ο Καύκασον εχαίρουτον κι ο Πόντον ετραγώδ’νεν,

εγώ σον κόσμον έρχουμνε με τ’ άρματα ζωσμένος!

Ακρίτας και παλληκαράς σα χάλκενα τ’ αλώνια,

Ακρίτας και πολέμαρχος σου Πόντου τα ραchία,

Ακρίτας και Τραντέλλενας και  κοσμοφωτοδότες!

Στάθης Ι.  Ευσταθιάδης

Δικηγόρος- Συγγραφέας

1. κοσμοφωτοδότες = κοσμοφωτοδότης= αυτός, που με τις γενναίες πράξεις του σκορπάει φως στην Οικουμένη.

2. Τραντέλλενας = ο τριάντα φορές Έλληνας, γνήσιος Έλληνας,

3. ιγεύ’ς = ταιριάζεις, είσαι αντάξιος,

4. αναχάπαρα = ξαφνικά,μονομιάς, 

5. εντώκανε = πιάσανε, χτυπήσανε,

6. πόνια = οδύνες τοκετού,

7. ραchία = βουνά.