EKEINA NΤΟ ΘΑ ΔΕΒΑΕΙΣ ΣΗΝ ΚΟΙΛΙΑ Μ’ ΕΧ’ ΑΤΑ

Ένας τρανός πεντικός, σο βράδον κέσ' εσέβεν σην εγκλεσίαν τη χωρί και ως το μέρωμαν εταρταγάντσεν  όλα τα βιβλία ντο έταν εκειαπέσ'.

Το πρωί καμαρωτός και με το πετσάμπαρον γομάτον επέρεν την στράταν να πάει εμπαίν' σο τρυπίν ατ' και να αναπάεται.

Ση στράταν επέντεσεν τον ποπά Γιώρ'· Αφού εκαλημέρτσεν ατον, ερώτεσεν ατον:

Πάτερ πού πας πρωί πρωί;

Σην εγκλεσίαν, πού θέλτς να πάω.

Και ντο θα πας ευτάς σην εγκλεσίαν;

Ντο θα πάω ευτάω πα ντο λόγος έν'; Θα πάω δεβάζω.

Πάτερ, ντο θα πας δεβάεις;

Εσέν πα λογαρίαν θα δίγω ντο θα δεβάζω;

Δέβα, δέβα ας τερούμ' ντο θα ευρήκ'ς και δεβάεις;

Ντο είπες, αφορισμένε βελζεβούλ';

Εκείνα ντο θα δεβάεις σην κοιλία μ' έχ’' ατα· Αέτσ' είπεν κ' εδέβεν πλαν.

Αγία Άννα-Τραπεζούντα

ΛΕΞΙΛΟΓΙΟ

σο βράδον κέσ' = κατά το βράδυ μέρωμαν = ξημέρωμα

εταρταγάντσεν = καταξέσχισε (ρ· ταρταγανίζω)

ντο έταν εκειαπέσ' = που ήταν εκεί μέσα

πετσάμπαρον = πέτσινο αμπάρι (κοιλιά)

επέντεσεν = συνάντησε (ρ· απαντώ = συναντώ)

και ντο θα πας ευτάς= και τι θα πας να κάνεις (ρ. ευτάγω)

λογαρία = λογαριασμός

δ ί γ ω = δίνω

δ έ β α = πάνε (ρ. δαβαίνω)

ας τερούμ' = να δούμε (ρ. τερώ)

ν τ ο = τι

εδέβεν πλαν= έφυγε (p. δαβαίνω)

ΔΗΜΗΤΡΙΟΣ ΝΙΚΟΠΟΛΙΤΙΔΗΣ 
Φιλόλογος-Συγγραφέας