ΧΩΡΙΣ ΣΥΝΤΑΓΗΝ 'Κ' ΕΠΟΡΩ ΝΑ ΔΙΓΩ ΣΕ

Η Παρέσα τη Κουρουσμάνονος επήεν σο φαρμακείον τη γειτονίας και είπεν τον φαρμακοποιόν, θέλω να δι'ς με τζουρνίκ'.

- Ντο θα ευτάς ατο, ερώτεσεν ατεν ο φαρμακοποιόν.

- Ντο θα ευτάγ' ατο, τ' εμόν δουλείαν έν'.

- Χωρίς συνταγήν 'κ' επορώ να δίγω σε.

-Άδικα μη χαντς τα λόγια σ', εξέρω τελευταία θα δί'ς με.

- Αν 'κι λες με ντο θα ευτάς ατο,  'κ' επορώ να δίγω σε·

- Αφού πισίεις ατόσον πολλά θα λέγω σε. Θέλω να φαρμακώνω τον άντρα μ'·

- Νέπουτση, εζάντυνες; Ντο εποίκεν εκείνο το καλόν το παιδίν;

- 0 καλομηνάς εδέβεν αποπάν' ατ'·

-'Κ' επορώ να δίγω σε και να ευρήκω την πέλά μ'·

- Εσύ  είσαι που  'κι δί'ς, είπεν η Παρέσα κι αμάν εξέγκεν ας σην τσόπαν ατ'ς έναν φωτογραφίαν κ' εδώκεν σον φαρμακοποιόν.

0 φαρμακοποιόν όντες είδεν σην φωτογραφίαν την γαρήν ατ' με τον άντραν τη Παρέσας, εμαύρυνεν κ' επεμαύρυνεν.  Εστάθεν ολίγον κ' επεκεί είπεν:

- ΑΤΩΡΑ ΠΟΥ ΕΔΩΚΕΣ ΜΕ ΣΥΝΤΑΓΗΝ,ΘΑ ΔΙΓΩ ΣΕ.

ΛΕΞΙΛΟΓΙΟ
τζουρνίκ' = δηλητήριο (το αρσενικό)
ντο θα ευτάς ατο = τι θα το κάνεις (ρ. ευτάγω)
πισίεις = επιμένεις (ρ. πισίζω)
νέκουτση = καλέ,
εζάντυνες = τρελάθηκες
ντο εποίκεν = τι έκανε
αμάν εξέγκεν = αμέσως έβγαλε (ρ. εβγάλλω)
την γαρήν ατ' = την γυναίκα του
επεμαύρυνεν = μαυροκιτρίνισε (απομαυρύνω)
 επεκεί = μετά

Δημήτριος Νικοπολιτίδης
Φιλόλογος-Συγγραφέας