Σιμά 'ς σο Χαψίκιοϊν, αφκά 'ς σο ποτάμ', το Μάτσκα τερεσί, και 'ς σο ζεβρέν το χέρ' απάν', τρία ώρας μακρά ας σο μαναστήρ' τ' Αγιάνν' του Βαζελών, έτον η Κουνάκα, έναν μικρόν ρωμαίικον χωρίον.
Συγκράτα πα όλα ρωμαίικα χωρία: το Στάμαν, η Ποντίλα, τοι Γιαννακάντων, η Κρένασα, τ' Αδολη, τη Καμπανά και τη Τσιμπρικά.
Προτού να γίνεται χωρίον η Κουνάκα, έσαν εκεί 'ς σον τόπον απέσ' δύο εγκλησίας χώρο χώρα , οι παλαιοί έλεγαν, έχτ'σαν ατά οι Κομνηνάντ'. Τ' έναν έτον Ά(γ) ε Γοργόρτς, παλαιόν μαναστήρ', βυζαντινόν, και τ' άλλο έτον Ά(γ)ε Κωνσταντίνον.
Αποπέσ' όλρν ζωγραφίας και ντ' έμορφα πα έσαν, εθαρρώ τερώ ατά!
Τα xpovα ντ' επήγεν εκεί Αμιρόγλης, έστεκαν τα ψηλά τα τουβάρα τη μαναστηρί'.
Επεκεί μερέαν έσαν τα ταφία τη μαναστηρί, γομάτα αχάντα
και καφούλα, άμον ορμάν. Πέραν καικά έτον έναν πεγάδ' πελεκετόν, παμπάλαιον. Ανουκά, εκείνο το σελέν έλεγαμ' ατό το Μεσορρύμ'. Σ' εκείνο 'ς σο πεγάδ', άνθεν μερέαν, έσαν δύο παρεκκλήσα μικρά, Άε Βασίλτς κι Αε Παγκράτς. Θα έσαν τη μαναστηρί', είχαν παλαιά τεμέλα.
Άλλο άνθεν μερέαν, έτον η Πανα(γ)ία, τα Εισόδια. Έχτ'σαν ατέν υστερ'να, απάν' 'ς σο παλαιόν. Εκεί ετοπλαεύκουσαν όλα τα χωρία τση Ματσούκας, Τούρκ' και Ρωμαίοι, 21 τ' Αεργίτα και εποίναν τρανόν τερνέκ. Εποίναν οι Κουνακαλίτ' φα(γ)ία, τσορβάδες, κι ας σην εγκλησίαν κι υστερνά, εφάζ'ναν όλον ον κόσμον, τσοι ξέντς. Ετοπλαεύκουσαν εκεί ας σ' όλα τα μέρα.
Ενοίουσαν σερκία. Εκεί ρακία, ποτία, ζουρνάδες, ταούλα, κεμεντζέδες, παίγ'νιας, ώσνα εσκοτίνευεν, έτρωγαν, έπιναν κι εχόρευαν. Ως το μεσανύχτ' εκουσκεύκουσαν τα λαλίας, τα συρσίματα και τα τραγωδίας.
Στάθης Χριστοφορίδης
Για τον Στάθη Κ. Χριστοφορίδη - Σάρπογλη (1905-1984), ο Νίκος Λαπαρίδης έγραψε, μεταξύ άλλων: «Οι περιγραφές τον είναι ιδιαίτερα ζωντανές. Τα ιστορικά, γεγονότα παρατίθενται πολύ παραστατικά και φυσικά».
