NΑ ΕΥΡΗΚ'Σ ΠΟΙΟΣ ΕΚΟΥΝΤΕΣΕ ΜΕ

Τα Φώτα την ημέραν έτον. Πριν κάμποσα χρόνα οι Σέσλοβαληδες εκατήβαν αφκά σο ποτάμ κ’ ενέμεναν τον ποπάν να έρται σύρ’ τον σταυρόν σο νερόν.

 Πολλά ‘κ’ επήεν κι ο ποπάς έρθεν έψαλλεν το εν Ιορδάνη βαφτιζομένου σου Κύριε κ' έσυρεν τον σταυρόν σο ποτάμ’, άμαν κανείς 'κ’ ερούξεν να πιάν’ ατο γιατί εποίνεν τρανόν παγωνίαν.

Ατότε ο πάρεδρον τη χωρί’ επαρακάλεσεν και είπεν:

 - Ήντζαν ρούζ’ σο ποτάμ’ και φέρ’ τον σταυρόν θα δίγ’ ατον ό,τι ψαλαφά με.

Καλά καλά 'κι είπεν ό,τι ψαλαφά με και ο Κοσμάς ο Παυλίδης (το προσωνύμ'ν ατ' ψαράς) ευρέθεν με τα λώματα σο ποτάμ’.

 Επέρεν τον σταυρόν κ’ επήεν ίσα σον Πά­ρεδρον. Ο πάρεδρον εγκαλάστεν κ’ εφίλεσεν ατον και είπεν ατον:

- Κόσμα, ντο θελτς ας εμέν’

 - Πάρεδρε, ας εσέν δεν 'κι θέλω, μαναχόν να ευρήκ'ς ποίος εκούντεσε με κ’ ερούξε με σο ποτάμ’.

ΛΕΞΙΛΟΓΙΟ

Σέσλοβαληδες, = οι κάτοικοι του Σεβαστού, χωριού του Ν. Κιλκίς
α φ κ ά= κάτω
εποίνεν = έκαμνε
 ήντζαν = όποιος
 ρούζ' = πέσει,
οτι ψαλαφά με = ότι μου ζητήσει

 λώματα = ρούχα
 εγκαλάστεν = αγκάλιασε

 εκούντεσε με = μ' έσπρωξε

ερούξε με = μ' έριξε

Δημήτριος Νικοπολιτίδης
Φιλόλογος-Συγγραφέας