Αλλομίαν θα ψαλαφά και την ποπαδίαν

Ο Τριανταφυλλίδης ο διάσκαλον, οντάν επέγνεν εψάλνεν σήν Σουμελάν, εψαλάφεσεν τον ποπάν (παπα - Μανώλην Φωτιάδην) κερία για τον Αι-Γιάννη τη Καστανέας. Ο ποπάς είπεν άτον: Έπαρ όσον ντο χρειάσσκεσαι.
 Έναν άλλο ημέραν ,εψαλάφεσεν λαμπάδας και ο ποπάς εδέκεν άτον. Μίαν κι άλλο εψαλάφεσεν θυμίαμαν, και καρβόνια και επαίρεν.
Πολλά κ' εδέβεν, έστειλεν δυο παιδία και εψαλάφεσεν κεραμίδια.

 «Μέτα, είπεν ο ποπάς, τα κεραμίδια χαλάλν άτ, άμα ατός όπως πάει, σ' αλλομίαν θά ψαλαφά και τhν ποπαδίαν.