Σειρά, μπου σειρά!...

Σα 1914 τη χρονίας, όνταν εγίνουνταν οι διωγμοί τοι χριστιανίων σην Θράκην και σην Σμύρνην, το Πατριαρχείον εξέγκεν προσταγήν να κλειδών’νε όλα τα σκολεία και όλα τ’ εγκλεσίας των  ρωμαίων σ’ όλον την Τουρκίαν επειδής και το «Έθνος εκηρύχθη εν διωγμώ», όπως έλεγεν το πατριαρχικόν το γράμμαν.

Ατότες, οι μειζετέρ’ τοι προτεσταντίων τ’ Ορτούς εποίκαν έναν επιτροπήν κ’ επήγαν σον σχολάρχην, τον Νίκον τον Σουμελίδην και είπαν ατον να κλειδών’νε εκείν’ πα το σκολείον και το βαΐζ’ν άτουν.

Είπεν ατ’ς κι ο σχολάρχης:

«Εμείς ’κ’ επορούμε να παίρομε απάν’ εμουν βάρος για τ’ εσάς, επειδής και ο Ελληνισμός με την ορθοδοξίαν είν’ έναν και οι διωγμοί για τ’ εσάς ’κ’ είναι».

Όνταν έκ’σεν την απάντησην ο σ’χωρεμένον ο Χρήστον τη Λεμόνας, ’κ’ έκλαψεν μανάχον. Εκείνος ο μασχαράνον ο Χρήστον άλλο το κατσίν ατ’ ’κ’ εγέλασεν. Ασ’ σην καρδίαν ατ’ απέσ’ γαίμαν έσταζεν.

Είδεν ατον αδελφός ατ’ ο Διαμαντής, έμαθεν την αιτίαν και σ’κούται λέει ατον:

—Άδελφε, σειρά μπού σειρά, έλα ας κλώσκουμες.

(Οι Έλληνες ευαγγελικοί των Κοτυώρων διατηρούσαν ακέραιο το εθνικό τους φρόνημα. )

Ξένου Ξενίτα

(Ξενοφώντα Άκογλου) 

ΛΕΞΙΛΟΓΙΟ

μειζετέρ’ = προεστοί,

 βαΐζ’ = έτσι έλεγαν οι ορθόδοξοι των Κοτυώρων την εκκλησία των ευαγγελικών, 

’κ’ έκλαψεν μανάχον = μόνον που δεν έκλαψε,

 μασχαράνος = ευθυμολόγος και εύθυμος μαζί τύπος,

 κατσίν = πρόσωπο, μέτωπο, 

σ’κούται = σηκώνεται,

 σειρά μπού σειρά = να η ευκαιρία