Το πεγάδ’...

Ση Φιλοποίμη τ’ οσπίτ’ , που έτον σο γιαν’ τ' οσπιτί τη Βουτσιαλάβας, εκάθουτον ο ποπά Νικόλας με την ποπαδίαν. Έναν ημέραν έρθεν να διαβαίν’ ασ’ ση στράταν ο ποπά Νικόλας, είδεν ατον η Βουτσιαλάβα και λέει ατον:

-«Πάτερ’, αβούτο ο τροχόν τη πεγαδή εχαλάεν και νια κατηβάζ' και νια ανεβάζ’ τη βέτραν να παίρομε νερόν.

Εσύ πετσιαρουχλής είσαι και τα χέρια σ’ πϊάνε σ' όλια, έλα τέρ’ και διόρθωσον ατο, εσείν πα απ’ ατό παίρετεν νερόν.

-«Παρθένα», είπεν ατεν ο ποπα Νικόλας, «την Κερεκήν θα έρται ο δεσπότ’ς  ασ' σο Κιλκίς να λειτουργά αδά και θα λέγ’ ατον να έρται διορθώνει  ατο»

-"Μώ σε, τη ποπαδίας το βρακίν κάθεσαι σο παλγόν κι εμπαλί’εις κι ατό κι θέλτς να εφτάς !",     είπεν ατον η Βουτσιαλάβα.

Γεώργιος Παρχαρίδης