Ηλί, Ηλί λαβάς σαλαχανί

Ο ποπα - Γιάννες ας σ'  Iσχανάντων, τηνάν εκόλτσαν Αγρόποππας, έτον αγράμματος.

 Έναν ημέραν σον χειμωγκόν απέσ επήεν σο παρακάθ' ση Πατσιακίνας. Είχεν κ' έναν μικρόν Βαγγέλεν με τ' εκείνον, εξέγκεν  άτο να δεβάζ τη Μεγάλ Παρασκευής το Βαγγέλεν και να εξηγίζ' άτο τοι γραιάδας.

Όνταν έρθεν σο Ηλί, Ηλί λαμά σαβαχθανί, ο ποπα - Γιάννες εδέβασεν:

Ηλί, Ηλί, λαβάς σαλαχανί.

Η Πατσσιακίνα ερώτεσεν άτον:

- Διάσκαλε, να έχομε την ευκή σ, απ' ατό δεν 'κ εγάνεψα.

- Επείνασεν εκείνο την ώραν ο Χριστόν και εκούξεν τον Προφήτεν τον Ηλίαν να φέρει άτον λαβάς με τα λάχανα.

- Ουϊ ναϊλλοί εμέν, είπεν η Πατσιακίνα, κ' εμείς οι αμαρτωλοί τα κεπία μουν γομάτα λάχανα, και λαβάς πα άν κ έχομε, ψωμίν πόλικον  έχομε.


Δημήτρης  Λαμπριανίδης