Εσυ ευρέθες ο έξυπνον;

O Λευτέρτς τη Πάτσονος, αφού εγόμωσεν έναν καλά το πετσάμπαρον, ατ' με μαλέζ ' σο μα(γ)ειρείον τη Ιγνάτ',  επήεν ση βρύσην να πλύν  τα χέρα τ'.
 Εκαικά  είδεν κρεμασμένον έναν πεσκίρ' κ' εταράεν τ' απέσ' ατ.
Επήεν ίσα σον μά(γ)ειραν και είπεν ατον:

- Για πέει με, εκείνο το πεσκίρ' ντο κρεμάεται εκαικά, πλύσιμον είδεν  καμίαν;
- Για δέβα χάθ' ας σο κιφάλι 'μ αφορισμένε μαλεζόστομε, είπεν ατ ο Ιγνάτ'ς.
 Με τ'  εκείνο εσπογγίγαν δύο  χιλιάδες  ανθρώπ' κ' ένας  παράπονον  'κ' εποίκεν, εσύ ευρέθες ο έξυπνον;


ΛΕΞΙΛΟΓΙΟ
Πετσάμπαρον: πέτσινο αμπάρι, κοιλιά
 μαλέζ: αλευρόσουπα
 εκαικά : εκεί κοντά
 πεσκίρ': πετσέτα
εταράεν τα' απέσ' ατ' : ανακατεύτηκε
 για δέβα χάθ' : για πάνε χάσου
 μαλεζέστομος: μεταφ. Χαζός
 εσπογγίγαν: σκουπίστηκαν
κ' εποίκεν: δεν έκανε

ΔΗΜΗΤΡΙΟΣ ΝΙΚΟΠΟΛΙΤΙΔΗΣ