Λελεύω σας ρασία τη Σαντάς,
παρχάρια και γιαϊλίμια,
ορμάνια και γιαζία,
τσιτσιάκια και ζουγούδια,
ποτάμια και ορμία.
Σαντά μ' λελεύω τα χωρία σ':
Πιστοφάντων, Τσακαλάντων,
Ισχανάντων, Πινιατιάντων,
Τερζάντων, Κοζλαράντων και
Ζουρνατσάντων.
Λευλεύω Σαντά μ' τα Φτελένια σ':
Τρανόν Φτελέν, Χαρατσάντων,
Αλιάντων, Δώδεκα Αλάτια,
Κοπαλάντων
και τη Χαπιάρ το Φτελέν.
Λελεύω τ'
οσπίτια σ', τα σχολεία σ',
τα εκκλησίας σ', τα πεγαδομάτια σ'
με τα νερά τα κρύα.
Γονατίζομε και φιλούμε τ' Αϊα χώματα
σ' Σαντά μ' τα χώματα σ' ντ' επορπάτεσαν οι παπούδες' εμούν, οι κυρούδες'
εμούν, οι καλομανάδες' εμούν, οι μανάδες εμούν και ολ' τ' εμετέρ.
Γονατιζμέν' είμες και για τ' ατουνούς π' εσκοτώθαν για τ' Εσέν, π' εχάθαν σα εξορίας και ας' ανεσετίας, και για τ' ατουνούς που τα 'στούδια τουν κείνταν σ' όποιον μέρος κι' αν εν'.
Ισχανάντων Σαντάς Πόντου 14-8-1990
Γεώργιος Δ. Παρχαρίδης