Ο Γιωργούλης και ο Χάροντας

Τον Αύγουστο του 2008, ο Νίκος Παλασίδης, καθηγητής και από τους καλύτερους χορευτές χορών της ποντιακής παράδοσης, συγκινημένος βαθύτατα από τον θάνατο του λυράρη Γιωργούλη Κουγιουμτζίδη έγραψε ένα συνθετικό ποίημα σε μορφή θεατρική, με χορό — αφηγητή και πρωταγωνιστές τον ίδιο και τον Γιωργούλη. 
Την αρχή από αυτήν την ποιητική σύνθεση δημοσιεύουμε στη συνέχεια.

Χορός: Νίκο, για πέει μας ντο νουνίεις κ' έκλισες το κιφάλ-ι- σ';
Εσύ 'εμαραγγουλίασες τα χείλα σ' 'κι γελούνε.
Νίκο, για πέει μας ποίον έν' ατό ντο τυρανί-ει σε.
Γιαμ η δουλεία σ' πάει οπίσ', γιαμ 'κ' έν' καλά η ύια σ';

Νίκος: Δοξάζω πάντα τον Θεόν π' έχω καλά την ύια μ',
τα ποδαρόπα μ' είν' γερά, τα χέρα μ' είν' τσαλίκα,
το σώμα μ' έν' κατάγερον, με άρκον πα παλεύω.
Άμαν τη ψής η καμονή 'κι σύρκεται καμίαν.

Χορός: Εμείς άμον τ' εγροίξαμε η καμονή σ' τρανόν έν'.
Πέει μας ντο τρώει τ'εσόν την ψήν κ' είσαι αέτσ' πως είσαι;

Νίκος: 'Κ' εξέρω είδα όρωμαν, 'κ' εξέρω έν' αλήθα,
ατώρα ντο θ' αναστορώ και λέγω σας ντο είδα...
'Κ' εξέρω αν θα τραγωδώ, 'κ' εξέρω αν θα κλαίγω.
'κ' εξέρω αν θα επορώ να λέγω σας πώς έτον...
Άμαν εξέρω τσιπ καλά αούτο ντο ακούω
κ' εντάμαν μετ' εμέν εσείς καλά αφουκρούστουν...
'Σ ση τοξαρί το σύρσιμον απάν' 'ς σα τρία κόρδας
ντο πονεμένα τραγωδούν τη Παραδείσ' πουλιά!
Ατό τ' εσόν το παίξιμον, Γιωργούλη Κουγιουμτζίδη,
έκ'σανε και εζέλεψαν τη Παραδείσ' πουλιά
κ' εθέλεσαν να παίρ'νε σε, εκεί αφκά 'ς σον Άδην
εσύ να παίεις την κεμεντζέ σ' κι ατά να κελαϊδούνε...