Δείγματα της Ποντιακής Διαλέκτου

Το πάρσιμον της Πόλης (Ποντιακό Δημοτικό)

Την Πόλιν ουντάς ώριζεν 
 ο Έλλεν Κωνσταντίνον
με δεκαπέντε σήμαντρα,
 με δεκοχτώ καμπάνας
με δώδεκα Αρχιερείς,
 ποπάδας τετρακόσιους
διακόνους  εικοστέσσερα,
 ψαλτάδας εβδομήντα
σειτ' έψαλλαν,
 σειτ' ώριζαν 
την Πόλ' την Ρωμανίαν,
σημαίνει κ' η αγιά Σοφιά,
 το μέγα μοναστήρι.
Ζερβά κάθετ' ο βασιλέας,
 δεξιά ο Πατριάρχης
ο βασιλέας, ο βασιλέας,
 ο Έλλεν Κωνσταντίνον
ψάλλουν το «άγιος ο Θεός»
 και την «τιμιωτέραν».
Έρθεν πουλίν κ' εκόνεψεν
 σ' αγιάς Σοφιάς την πόρταν,
το έναν το φτερούλ ναθε
 σο αίμαν εν βαμμένον
και σ' άλλο το φτερούλ ναθε 
χαρτίν κρατεί γραμμένον.
Ατό κανείς κ' ενέγνωσεν 
ουδ' ο Μητροπολίτης
έναν παιδίν, καλόν παιδίν,
έρχεται κι' αναγνώθει,
σείτια δεβάζ, σειτ' αναγνώθ' και
δερνοκοπισκάται
- Αϊλοί εμάς, και βάι εμάς,
 οι Τούρκ' την Πόλ' επαίραν.
Επαίραν το βασιλσσκάμν,
 ελάεν αφεντία».
Μοιρολογούν τα εγκλησιάς,
 κλαίνε τα μοναστήρια,
μοιρολογά κι αγιά Σοφιά,
 κλαίει κι ο Θεολόγον.
Όλοι κι αν παργορεύκουνταν,
 όλοι κι αν γαλενίζνε
σον Αένεν τον Θεολόγον 
γαλένιμαν κ' επέμνεν.
Διάκος επαίρεν το σπαθίν,
 τ' ελλενικόν κοντάριν
Τριακόσους Τούρκους έκοψεν
 και δεκατρείς παράδας
'τσακώθεν το σπαθίν ατου,
 τσακώθεν το καντάρν ατ',
κι οντάς τερεί 'λομόναχος
 απές ση Τούρκς επέμνεν.
Πιάν'ατον τρείος λεβέντ' 
και τέσσαρες πασάδες,
και φέρν' ατον σον Πασάν 
και σον Τουρκοπολίτεν.

-Διάκε μ', συ αν επίανες
 εμέν, ντο θε εποίνες;
Θ' εβάλνες με σην φυλακήν
 σο χλοερόν τουσιέκι;
τώρα εγώ πίασα σε
 και ντο να φτάγ' εσένα;
Θα βάλω σε σην φυλακήν,
 σο χλοερόν τουσέκι.
-Παρακαλώ σε, ναι, Πασά, 
και ναι Τουρκοπολίτα,
εγώ 'χω χίλια φίλυρα, 
χίλια εκατοντάρια,
εμέν ζωήν για χάρισον
 καν πέντε εξ ημέρας».
Κι παίρ' τα χίλια φίλυρα,
 κι παίρ 'τ' εκατοντάρια
ουδέ ζωήν χαρίζ ατόν 
καν πέντε εξ ημέρες.
-Διάκε μ', Τούρκος θα γίνεσαι;
κ' εσέν ζωήν χαρίζω.
-Οπίς, οπίς, μαύρε Πασά,
 μαύρε Τουρκοπολίτα,
εγώ διάκος εγένουμνε,
 διάκος θ' αποθάνω».
Ατός, ατόναν έκοψεν,
 τον μέγαν σερασκέρη ν.

Από το βιβλίο του Παντ. Μελανοφρύδη

«Η εν Πόντω Ελληνική Γλώσσα»